 |
A parcela da antiga Comandancia de Mariña de Vilagarcía volverá, case 36 anos despois, a mans da Autoridade Portuaria. Así llo comunicou a Subdirección Xeral de Patrimonio do Ministerio de Defensa ao presidente da Autoridade Portuaria. Para que esta devolución sexa efectiva, só falta o trámite de sinatura da acta de entrega e recepción por parte do director xeral de Infraestrutura, Jaime Denis Zambrana, en representación do Ministerio de Defensa, e Javier Gago López, presidente do Porto. A parcela ten unha superficie aproximada de 3.100 metros cadrados e está situada na confluencia das rúas Avda. da Mariña e Elpidio Villaverde.
A Autoridade Portuaria iniciou os trámites para conseguir a reversión deste terreo nada máis facerse oficial a disolución da Comandancia Naval de Vilagarcía, no verán de 2007. Agora, menos dun ano despois, as xestións realizadas deron os seus froitos. Está pendente de fixarse data e lugar para o acto de firma da entrega, pero en todo caso espérase que se produza no prazo dunhas semanas.
Os primeiros contactos para conseguir a devolución da parcela realizáronse coa Subdirección Xeral de Patrimonio do Estado, dependente do Ministerio de Economía e Facenda. Este organismo comunicou, porén, que era o Ministerio de Defensa a institución coa que se debía acordar a súa entrega. Tras declararse por parte deste Ministerio a inneceseriedad dos terreos para os fins da institución, e descualificarse como vivendas militares as localizadas no edificio, xa se cumprimentaron todos os trámites necesarios para iso. |
|
