 |
A Autoridade Portuaria de Vilagarcía e a Universidade de Vigo asinaron un convenio de cooperación educativa para a realización de prácticas por parte de alumnos da citada institución académica. Grazas a esta iniciativa, que xa está vixente, unha estudante de Ciencias do Mar completará a súa formación durante dous meses no Porto arousán.
O obxectivo do convenio é a regulación dun programa de prácticas prepofesionales entre a Universidade de Vigo e a Autoridade Portuaria, a fin de facilitar a preparación para o exercicio profesional dos estudantes en áreas operativas da empresa relacionadas coa súa formación universitaria e as posibles saídas profesionais desde os estudos cursados, promovendo así o futuro desenvolvemento profesional e o acceso ao mercado laboral dos futuros titulados universitarios. A iniciativa pretende facilitar aos estudantes unha visión real do día a día do traballo nunha empresa, preparando a súa próxima incorporación ao traballo, dentro da sociedade.
Deste convenio poden beneficiarse alumnos que superen o 50% dos créditos da súa titulación, alumnos dos dous últimos anos de carreira (para aquelas que non teñan implantado o sistema de créditos) ou estudantes que estean preparando o seu proxecto de fin de carreira.
Á conclusión do período de prácticas, os participantes recibirán, se así o solicitan, un certificado asinado polas dúas entidades no que se fará constar a especialidade ou área en que se desenvolveu a práctica preprofesional e as tarefas realizadas. |
|
